Euskal Baserriko Oilaskoa

Eusko Labela duen Euskal Baserriko Oilaskoa haragia ekoizteko erabiltzen da eta jatorriz luma gorria eta hankak zein azala horiak ditu. Hainbat irizpide kontutan hartuta genealogikoki hautatuak dira, hau da, hazkunde motela, baserritartasuna eta kumea kanpoan libre hazitakoa izatea hain zuzen ere. Elikadura naturala dute,  GEO (Genetikoki Eraldatutako Organismoa) eta transgenikorik gabekoa, zerealetan oinarritua eta %60a baino gehiago artoa delarik.  Artisau erara ekoizten dira eta hiltzeko garaian  gutxieneko 81 eguneko heldutasuna izan behar dute. Honek guztiak kontsumilaileari erabat ziurtatzen dio haragi osasungarri, samurra eta zaporetsua izango dela,  merkatuan aurkitu ohi denaren aldean oso ezberdina.

Erabilgarri dauden formatuak

Eusko Labela duen benetako Euskal  Baserriko Oilaskoa osorik edo zatika merkaturatzen da, beti Eusko Label Kalitatea zeinuarekin adierazita. Oilasko osoen kasuan, zenbakidun eraztun bat daramate hankan, Eusko Label ikurrarekin. Zatien erretiluek ordea,   zenbakidun etiketa daramate Eusko Label bereizgarriarekin.